Rama: Legalizimi dje, proces klientelist dhe i kushtueshëm, sot falas dhe realitet

Kryeministri Edi Rama ka publikuar sot një video promocion për legalizimin ku sjellë në vëmëndje një personazh nga Zall – Dardha e Dibrës që në 2016, ka bërë të mundur legalizimin e shtëpive të vetëdeklaruar që në 2006.

Në videon promocion, thuhet në mënyrë grafike se: “legalizimi ishte një proces klientelist dhe i kushtueshem. Nga 2006-2013 u dhanë 21750 leje legalizimi”.

Personazhi në video nuk është aktor, por një personazh që rrefen sakrificën e tij për të ndërtuar shtëpitë dhe pritjen e gjatë për t’i legalizuar ato.

Ja rrëfimi i të ardhurit nga Zall-Dardha ne Bathore: “Familja ime vjen nga një zonë e thellë e rrethit të Dibrës, që quhet Zall- Dardhë dhe jemi vendosur prej 17 vitesh në Bathore.

Kam punuar në arsim, por me ardhjen e proceseve demokratike si gjithe të tjerët kishim ambicje për të bërë një shtëpi, me kursimet tona dhe kontributin e fëmijëve duke shkuar në emigracion shumë të rinj, keshtu arritëm të ndërtonim këto dy shtëpi.

Në 2005 i ndërtuam dhe në 2006 i vetëdeklaruam për të marrë legalizimet. Vetëm në vitin 2016, kjo ëndërr u realizua. E gjithë familja u kënaq sepse shtëpitë tona u kthyen në pronë për ta trashëguar ne dhe fëmijtë tanë”.