Reagimi i parë pas dorëheqjes, ja çfarë deklaron Zv.Kryeministrja teknike Mandija
Zv.Kryeministrja Ledina Mandija ka folur për herë të parë pas dorëheqjes nga ky post në lidhje me raportin e përpiluar nga ajo dhe teknikët e tjerë për zgjedhjet e 25 qershorit.
Mandija deklaron se materiali prej mëse 100 faqesh i është dorëzuar edhe ndërkombëtarëve.
“Në përfundim të procesit zgjedhor materiali përmbledhës që pasqyron gjetjet dhe konkluzionet e ministrive dhe të institucioneve të tyre të varësisë, dërguar me shkrim apo të diskutuara në mbledhjet e Task-Forcës, përbën produktin përfundimtar të punës që i shpërndahet anëtarëve të Task-Forcës, subjekteve zgjedhorë, OJF me objekt veprimtarie në fushën e zgjedhjeve si dhe partnerëve ndërkombëtarë e pjesëmarrësve të tjerë në proces.”- deklaron Mandija.
Sipas Ledina Mandija raporti do të shërbejë për të gjitha forcat politike në të ardhmen, pasi gjetjet mund të shfrytëzohen për të përmirësuar sistemin zgjedhor.
“Çdo e dhënë në materialin përmbledhës është një pasqyrim i saktë, i konsoliduar dhe sistematik i të gjithë informacionit dhe raportimeve në kohë të bëra veçmas nga secila ministri, si organ kushtetues, në përputhje me sferën e përgjegjësisë shtetërore që mbulon.
Ky material do të shërbejë në të ardhmen për forcat politike, por edhe për institucionet shqiptare që të reflektojnë lidhur me sjelljen institucionale dhe politike si dhe për të kryer ndryshimet e duhura në kuadrin ligjor me qëllim garantimin e zgjedhjeve të lira, të ndershme dhe demokratike në të mirë të qytetarëve shqiptarë” shprehet Mandija.
