Reforma në drejtësi – Mblidhet grupi i ekspertëve, mungon opozita

Grupi i ekspertëve të lartë për reformën në drejtësi ka vijuar të hënën në kryesinë e Kuvendit mbledhjen e radhës, pa praninë e përfaqësuesve të opozitës.

Dita e sotme është afati i fundit për përmbylljen e draftit, ku pritet të reflektohen rekomandimet e Komisionit të Venecias për projektin e ndryshimeve kushtetuese.

Nga nesër, ky projekt i ripunuar parashikohet t’i kalojë për miratim komisionit të posaçëm parlamentar për reformën në drejtësi.

Mungesa e opozitës në mbledhje lidhet me kundërshtimin e saj për disa pika të draftit, ky kryesor është zgjedhja e drejtuesve të institucioneve të larta të drejtësisë. Propozimi i PD-së parashikon votimin e tyre me shumicë kushtetuese, me 2/3 e anëtarëve të Kuvendit, gjë që kundërshtohet nga maxhoranca, e cila kërkon votim me shumicë të thjeshtë, 3/5-n e votave.

Në kushtet kur reforma ndodhet në afatet kohore limit, palët politike, por sidomos faktori ndërkombëtar po bën përpjekje të ethshme për gjetjen e mirëkuptimit dhe arritjen e një kompromisi të domosdoshëm për këtë reformë, mjaft të rëndësishme për Shqipërinë në ecurinë e saj drejt procesit të integrimit në BE.

Më herët, ambasadori i SHBA-së në Tiranë, Donald Lu u takua në Presidencë me Presidentin Bujar Nishani. Mendohet se në fokus të takimit është mungesa e konsensusit për draftin e reformës në drejtësi, i cili duhet të përmbyllet brenda ditës së sotme.