Reforma zgjedhore- Kuvendi voton të enjten përbërjen e komisionit

Kuvendi pritet të miratojë të enjten në seancë plenare përbërjen e komisionit të posaçëm parlamentar për reformën zgjedhore, i ngritur me një vendim të parlamentit në seancën e fundit (21 dhjetor) të sesionit të kaluar. Detyrë e komisionit është hartimi i amendamenteve për ligjin zgjedhor, si dhe trajtimi i rekomandimeve të raporteve të OSBE/ODHIR-it për zgjedhjet parlamentare të vitit 2013 dhe ato vendore të vitit 2015.
Komisioni do të drejtohet nga dy bashkëkryetarë, një nga Partia Socialiste dhe tjetri nga Partia Demokratike, ndërsa anëtarësia e tij ka përbërje të barabartë mes shumicës dhe pakicës, me nga pesë anëtarë. Komisioni do e ushtrojë veprimtarinë për një afat tremujor nga data e mbledhjes së parë te tij.
Tashmë janë bërë publike pothuajse të gjithë emrat me të cilët do të përfaqësohen partitë parlamentare në komision. Shumica parlamentare propozon për bashkëkryetar të komisionit, Bashkim Finon (PS), ndërsa anëtarë deputetët Vasilika Hysi (PS) dhe Ulsi Manja (PS) dhe pak më parë u bë i njohur dhe emri i përfaqësuesit të LSI-së, Petrit Vasili. Ndërkohe, pritet të zyrtarizohet anëtari i PDIU-së.
Opozita parlamentare nga ana e saj i ka bërë të njohur emrat me të cilët do të përfaqësohet në kete komision, bashkëkryetar Oerd Bylykbashi (PD) dhe anetare Arben Ristani (PD), Eduard Halimi (PD) e Gent Strazimiri (PD). Një vend i opozitës në komision i takon Partisë Republikane, që pritet të propozojë kryetarin e saj, Fatmir Mediu.