“Rusia më e rrezikshme se ISIS”
“Rusia është më e rrezikshme sesa vetë shteti islamik ISIS”. Kjo është deklarata e bujshme e ministrit të Jashtëm të Polonisë, e bërë gjatë një vizite në Sllovaki.
“Faktet tregojnë se aktiviteti i Rusisë është një lloj kërcënimi ekzistencial, pasi ajo ka aftësinë për të shkatërruar të gjitha vendet”, tha Vaszcikovski.
Ministri i Jashtem polak e përshkroi ISIS-in si një kërcënim shumë serioz, por tha se ai nuk përbën një kërcënim ekzistencial për Europën.
Vaszcikovski i bëri gjithashtu thirrje NATO-s që të miratojë vendosjen e trupave në kufirin lindor të Aleancës. Për bllokun ky hap do të jetë një simbol i vendosmërisë për të mbrojtur krahun lindor, i cili thotë se vazhdimisht po ndihet “nën presionin e Rusisë”.
Ndërkohë, më 20 prill NATO dhe Rusia do të zhvillojnë takimin e parë që prej qershorit të vitit 2014, kur Aleanca e Atlantikut të Veriut shkëputi marrëdhëniet me Kremlinin për shkak të aneksimit të Krimesë në Ukrainë dhe mbështetjes për separatistët prorusë në pjesën lindore të Ukrainës.
Në këtë takim, i cilësuar si i një rëndësie të lartë, Moska do të japë llogari në këshill për praninë e saj ushtarake të pajustifikueshme në shtetet balltike.
