CNN: SHBA ka humbur të paktën 7 avionë në luftën me Iranin

Sipas raportimeve në media, Forcat Ajrore të SHBA-së kanë humbur të paktën shtatë avionë në luftën e tyre me Iranin.

Siç raporton CNN, rrëzimi i dy avionëve luftarakë amerikanë dje brenda një dite, në incidente të ndara, përkatësisht një F-15 dhe një A-10, e ka rritur numrin total të avionëve me ekuipazh të humbur në konflikt me Iranin në shtatë.

Më 2 mars, vetëm disa ditë pas fillimit të luftës, tre avionë F-15 u rrëzuan gabimisht nga mbrojtja ajrore e Kuvajtit në një incident “zjarr miqësor” mbi Kuvajt.

Të gjashtë anëtarët e ekuipazhit arritën të shpëtonin duke u hedhur me parashutë. Sekretari amerikan i Mbrojtjes, Pete Hegseth, këtë javë deklaroi se tre pilotët janë rikthyer në misione fluturimi kundër Iranit.

Më 12 mars, gjashtë personel amerikan humbën jetën kur një avion cisternë KC-135 u rrëzua në Irak. Ushtria amerikane tha se avionët ishin përfshirë në një incident me një tjetër avion gjatë operacionit në Iran që nisi më 28 shkurt. Avioni tjetër u ul pa probleme.

Më 27 mars, një avion paralajmërues dhe kontrolli ajror E-3 Sentry u shkatërrua sipas raportimeve teksa ndodhej në tokë gjatë një sulmi iranian në Bazën Ajrore Prince Sultan në Arabinë Saudite.

Sulmi thuhet se plagosi të paktën 10 pjesëtarë të ushtrisë amerikane, megjithëse nuk u raportuan viktima. Burimet thanë se një avion cisternë i Forcave Ajrore të SHBA-së gjithashtu u dëmtua në sulm.

Duke cituar dy burime të njohura me situatën, CNN raportoi se në një incident tjetër, një avion luftarak F-35 amerikan u detyrua të bëjë një ulje emergjente në një bazë amerikane në Lindjen e Mesme muajin e kaluar pasi u godit nga ajo që besohet të ketë qenë zjarr iranian.

Rajoni ka qenë në gatishmëri që kur SHBA-ja dhe Izraeli nisën një ofensivë të përbashkët kundër Iranit më 28 shkurt, duke vrarë më shumë se 1.340 persona deri më tani, përfshirë edhe liderin suprem të atëhershëm, Ali Khamenei.

Teherani është kundërpërgjigjur me sulme me dronë dhe raketa që synojnë Izraelin, si dhe Jordaninë, Irakun dhe vendet e Gjirit që strehojnë asete ushtarake amerikane.   /os/