“SHBA do të vazhdojnë të përkrahin Kosovën në të gjitha fushat”

Presidenti i Republikës së Kosovës, Hashim Thaçi, ka pritur mbrëmë zëvendësndihmës Sekretaren e Mbrojtjes së SHBA-së, Laura Cooper, me të cilën ka biseduar për bashkëpunimin mes Kosovës dhe SHBA-së në sektorin e sigurisë.

Në një njoftim nga Presidenca e Kosovës thuhet se Thaçi gjatë takimit ka thëne se Kosova është mirënjohëse për përkrahjen e Shteteve të Bashkuara për Kosovën, veçanërisht për bashkëpunimin me FSK-në. Ai ka shtuar se FSK-ja ka ngritur kapacitetet e saj dhe tani është një forcë profesionale dhe gjithëpërfshirëse.

Ndërsa, Cooper, ka theksuar se Shtetet e Bashkuara do të vazhdojnë të përkrahin Kosovën në të gjitha fushat.

“Po punojmë, të koordinuar me partnerët ndërkombëtarë, që të plotësojmë të gjitha kriteret për transformimin e Forcës së Sigurisë në Forca të Armatosura të Sigurisë”, ka thënë presidenti Thaçi.

Duke theksuar dëshirën e palës kosovare që “transformimi të bëhet me konsensus politik dhe nëpërmjet ndryshimeve kushtetuese, presidenti Thaçi ka shtuar se megjithatë “ky proces nuk mund të zgjas pafundësisht”. Në fund, sipas njoftimit, Thaçi ka shtuar se gjendja e sigurisë në Kosovë është shumë e mirë dhe Kosova mbetet e angazhuar për paqe dhe stabilitet në rajon.

“Po kultivojmë dialog të brendshëm dhe në nivel rajonal, veçanërisht me Serbinë”, u shpreh presidenti i Kosovës.