SHBA-Kubë, Obama i jep fund politikës “këmbë e lagur, këmbë e thatë”
Presidenti amerikan, Barack Obama i dha fund politikës disavjeçare që u garantonte kubanëve që shkelnin në Shtetet e Bashkuara pa viza, që të fitonin statusin e rezidentit të përhershëm ligjor pas një viti.
Vendimi është pjesë e paktit të nënshkruar mes SHBA dhe Kubës pak muaj më parë dhe në këmbim, Havana ka pranuar që të pranojë shtetas të saj që u refuzohet qëndrimi dhe dëbohen nga SHBA.
Dhënia fund e politikës që njihej si “këmba e lagur, këmba e thatë” e që aplikohej vetëm për kubanët, ka marrë kritika nga komuniteti i tyre në SHBA. Ata thonë se Uashingtoni për shpërblen me këtë lëvizje një regjim që ka dështuar në adresimin e të drejtave të njeriut.
Por pavarësisht këtyre kritikave, administrata Obama duket e vendosur që në ditët e fundit të saj të respektojë paktin e nënshkruar me Kubën dhe afrimin mes dy vendeve.
“Me këto ndryshime, ne do të vazhdojmë të mirëpresim kubanët ashtu si pjesën tjetër të emigrantëve nga mbarë bota, brenda ligjeve tona”, tha Obama.
Ndërkohë, vendimi i Obamas është mirëpritur në Kubë. Havana e ka përshëndetur atë duke e cilësuar një hap tjetër përpara drejt përmirësimit të marrëdhënieve mes dy vendeve.
Megjithatë, është e paqartë nëse ky avancim në raportet SHBA-Kubë do të vazhdojë pas marrjes së detyrës nga Donald Trump. Ky i fundit disa herë ka lënë të kuptohet se do të mbajë qëndrim më të ashpër ndaj Kubës dhe mund devijojë nga kursi i normalizimit të marrëdhënieve.
