Sherri në ekipin shqiptar, Calja: Nuk garoj nëse Bezhani s’më kërkon falje

Për shumë sportistë ka nisur gara në Rio, ndërsa në ekipin shqiptar vijojnë përplasjet, aq sa peshëngritësi Briken Calja deklaron tërheqjen nga gara, nëse presidenti i Komitetit Olimpik Kombëtar Shqiptar, Viron Bezhani nuk i kërkon falje dhe të mbajë përgjegjësi për çfarë ka bërë publike.
“Nuk e marr vesh, a është Vironi i parë apo i dyti, ky që po flet për Top Channel? Një njeri i tillë duhet të ketë edhe përgjegjësi, sepse është president i Komitetit Olimpik Kombëtar Shqiptar. Nëse unë jam fajtor, unë tërhiqem nga sot, e them publikisht përsëri”, shprehet Briken Calja.
“Unë nuk jam zari i askujt, jam sportist i ekipit kombëtar dhe nuk pyes askënd”, thotë më tej Calja.
I pyetur nga gazetari Sokol Balla, nëse është i sigurt apo jo për pjesëmarrjen e tij në Olimpiadë, ai thotë:
“Kështu siç po shkojnë gjërat, duke parë edhe përgjigjen e presidentit të Komitetit Olimpik Kombëtar Shqiptar… Këtu kam ardhur për të përfaqësuar Shqipërinë, por kur vete puna deri në këtë pikë, dua vetëm që Viron Bezhani të kërkojë ndjesë publikisht”, u shpreh peshëngritësi.
Ndërkohë, Top Channel ka mundur të sigurojë përgjigjen e fundit të kontrollit antidoping, që Calja ka kryer 10 ditë më parë. Konfirmohet që gjithçka është në rregull, madje në stërvitjen e fundit Calja ka ngritur 181 kg, një peshë që sipas të dhënave zyrtare i korrespondon zonës së medaljeve.