Shpërfillet dekriminalizmi, nga 1.836 të zgjedhur, vetëm 255 kanë plotësuar formularët
Kur kanë mbetur më pak se dy javë nga skadimi i kohës për dorëzimin e formuarit të vetëdeklarimit, interesi i të zgjedhurve të çdo niveli politik është fare i vakët.
Deri të hënën e kësaj jave në Komisionin Qendror të Zgjedhjeve ishin dorëzuar vetëm 4 formularë deputetësh. Ndërsa deri në mëngjesin e së premtes, numri i deputetëve që kanë plotësuar formularin ishte 52 dhe ministra vetëm 3.
Aktualisht nga 1836 funksionarë, kanë dorëzuar formularët e vetëdeklarimit pranë KQZ-së, 255 ose 13,9 % % e tyre.
Komisioni Qendror i zgjedhjeve ka ngritur infrastrukturën online për të lehtësuar procedurën dhe në vende të dukshme ka publikuar formularin bashkë me aktet e tjera ligjore, ku paralajmërohet se, nëse ky formular nuk plotësohet i rregullt dhe nuk dorëzohet brenda datës 4 maj në KQZ, të zgjedhurit humbasin mandatin menjëherë. KQZ-ja shpjegoi me detaje sesi duhet vepruar, që plotësimi dhe dorëzimi të quhet i vlefshëm.
Formulari duhet të plotësohet me kompjuter, me përjashtim të emrit e mbiemrit dhe nënshkrimit (në fund të çdo faqeje) që duhet të plotësohen me shkrim dore; formulari, pasi të jetë plotësuar e printuar, nënshkruar, të depozitohet në KQZ personalisht (dorazi) nga secili funksionar që ka detyrimin për të dorëzuar formularin e vetëdeklarimit.
Të njëjtin detyrim e kanë pothuajse të gjithë personat që punojnë në administratë dhe disa organe shtetërore, duke nisur nga shërbimi informativ, tek ushtarakët, Policia e Shtetit, diplomatët dhe të gjithë nëpunësit civilë.
