Shpërthen me tritol makina e biznesmenit, 200 m nga komisariati

Fushë-Krujë 

Dje në mbrëmje, makina e një biznesmeni ka shpërthyer nga një sasi e konsiderueshme tritoli. Lënda plasëse ishte vendosur në makinën e 33-vjeçarit Edmond Kadiu, i cili është biznesmen në qytetin e Fushë-Krujës dhe nga shpërthimi nuk është shkaktuar ndonjë viktimë apo i plagosur, përveç dëmtimit të makinës dhe bizneseve përreth. Nga burimet policore mësohet se tritoli është vendosur në lagjen “Kastrioti”, e cila është vetëm 200 metra larg nga rajoni i Policisë së Fushë-Krujës. Lënda plasëse është vendosur në makinën tip “Benz Cl” me targa AA 044 KJ, në pronësi të biznesmenit Edmond Kadiu. Automjeti ishte i parkuar pranë biznesit të Kadiut, që ndodhet rreth 200 metra nga komisariati i policisë. Nga policia mësohet se Kadiu është biznesmen në qytetin e Fushë-Krujës. Pronari është shprehur se nuk ka konflikt me askënd dhe se automjetin e kishte parkuar poshtë banesës së tij. Policia shkoi në vendngjarje dhe po punon për zbardhjen e ngjarjes. Ende nuk ka ndonjë pistë hetimore, ndërsa paraprakisht dyshohet për konkurrencë ose konflikte personale.