Shqipëri-Greqi, marrëveshje bashkëpunimi. Çako: Policia ka një gjuhë, ligjin
Krerët e policive të të dy vendeve kanë firmosur një marrëveshje bashkëpunimi me disa pika.
Kreu i Policisë së Shtetit, Haki Çako është takuar në Janinë me homologun e tij grek, Dimitros Tsaknakis. Të dy bashkëbiseduesit shprehën vendosmërinë për të forcuar më tej bashkëpunimin dhe marrëdhëniet dypalëshe.
Z. Çako tha se policinë nuk e dallon dhe e ndan as gjuha, as shtetësia. “Policia ka një gjuhë dhe një shtetësi; ligjin. Të shërbejë për të siguruar rendin dhe të luftojë krimin. Këto parime i bashkojnë punonjësit e policisë në çdo cep të globit”, është shprehur ai.
Palët ranë dakord për forcimin e bashkëpunimit në parandalimin e migracionit ilegal dhe luftës ndaj krimit ndërkufitar.
Pikë tjetër ishte edhe rritja dhe forcimi i bashkëpunimit në luftën ndaj krimit të organizuar, trafikut të drogave dhe të qënieve njerëzore.
Gjithashtu, u ra dakord për rritjen e shkëmbimit të i informacioneve për personat në kërkim, krimet e rënda dhe aktet teroriste, ashtu si edhe për zhvillimin e operacioneve të përbashkëta në fushën e trafiqeve të paligjshme.
Palët konfirmuan vullnetin e tyre të mirë për të finalizuar sa më shpejt të Draft-Marrëveshjen për ngritjen dhe funksionimin e Qendrës së Përbashkët të Bashkëpunimit Policor, në Kakavijë.
Këtij takimi i ka paraprirë ai i zhvilluar në Sarandë mes drejtorëve të Përgjithshëm të Kufirit dhe Migracionit të Shqipërisë e të Greqisë, përkatësisht Genc Merepeza dhe Zacharula Tsirigoti.
