Shqipëria, Kroacia dhe Bosnja do të marrin kuota të njëjta nga gazi i TAP-it

Shqipëria bashkë me disa vende të rajonit janë duke lobuar në Komisionin Europian për të siguruar financimet e  nevojshme për projektin IAP (linja dytësore e gazsjellësit TAP që do të furnizojë Malin e Zi, Kroacinë, Bosnjën dhe Kosovën nëpërmjet Shqipërisë).

Burimet zyrtare nga Enti Rregullator i Energjisë bëjnë me dije qeveria  shqiptare ka aplikuar tashme për financime dhe po punohet ngushtësisht me qeveritë e dy shteteve te tjera ku kalon ky projekt, Malit te Zi dhe Kroacisë për sigurimin e këtyre fondeve e duke shkuar drejt realizimit te këtij projekti.

Projekti IAP do të kalojë në drejtim të veriut, përshkon ne mënyrë gjatësore territoret e vendit tonë, dhe për rrjedhojë do të shërbejë si një magjistral, rrjet transmetimi i presionit të lartë, duke siguruar kështu një furnizim të qëndrueshëm afatgjatë me gaz.

Ky projekt do të bëjë lidhjen me projektin TAP-AG, nëpërmjet Shqipërisë, Malit të Zi do të përfundojë ne Kroaci, dhe nga ky projekt do të përfitoj, Kosova dhe Bosnja Hercegovina. Gjatësia e këtij tubacioni do te jete 511 km, do te transportoje 5 bcm/vit dhe përfituesit nga kjo sasi gazi do të jetë:

Shqipëria me 1bcm/vit

Mali i Zi me 0,5 bcm/vit

Bosnja dhe Hercegovina 1bcm/vit

Kroacia me 2.5 bcm/vit

Kosova do të marrë gaz nëpërmjet Shqipërisë, njofton ERE. Projekti TAP në vendin tonë tashmë ka hyrë në periudhën e implementimit të tij, ose në fazën e ekzekutimit, dhe pas tij do te kemi ndërlidhjen me projektin tjetër IAP.

TAP certifikohet në të tre vendet si transmetues i pavarur

 Entet rregullatorë të Energjisë të tri vendeve nga ku do të kalojë tubacioni i gazsjellësit Trans Adritic Pipeline, Shqipërisë, Greqisë dhe Italisë e kanë certifikuar si Operator të pavarur Transmetues bazuar në modelin ITO të Paketës së Tretë të Energjisë.  Vendimi final merr në konsideratë certifikimin e TAP, sipas direktivave të Komisionit Europain dhe Sekretariatit të Energjisë.

Në lidhje me këtë çështje, drejtori menaxhues i projektit TAP, Ian Bradshaw tha se : “Jam shumë i kënaqur nga progresi i bërë deri tani me projektin TAP. Pas realizimit të kontratave tona strategjike, arritjes së tubacioneve të para në Shqipëri,  certifikimi ITO është një tjetër sfidë e arritur, por ne do të duhet të vazhdojmë më tej. Do të doja të falënderoja të tre autoritetet, Komisionin Europian dhe Sekretariatin e Komunitetit të Energjisë për bashkëpunimin në këtë proces”.

Në vitin 2013, TAP siguroi një përjashtim nga disa dispozitave të Direktivës së BE-së gazit (2009/73 / EC), duke përfshirë edhe atë mbi pronësinë për një periudhë prej 25 vjetësh.