Shqipëria, ndër të fundit në Europë për vaksinimin, Serbia rekord në rajon e BE

Sipas të dhënave të “The Our World in Data”, që gjurmon ecurinë e vaksinimit në shumë vende të botës, në Shqipëri deri në datën 14 shkurt, ishin administruar 0.04 doza vaksinash për 100 banorë.

Mesatarja e Europës deri në 16 shkurt ishte 5.91 doza për 100 banorë, me rekordin që e mban Mbretëria e Bashkuar prej 23.75 doza. Mesatarja e Bashkimit Europian ishte 5.02 doza.

Në rajon, rekordin e mban Serbia, që në fakt rezulton e dyta në Europë, pas Mbretërisë së Bashkuar, që deri në 18 shkurt kishte administruar 18.36 doza për 100 banorë, duke ia kaluar madje edhe Shteteve të Bashkuara të Amerikës.

Italia ka administruar 5.06 doza për 100 banorë, Greqia 5.52, Kroacia 2.94. Bullgaria 1.17. Nuk ka të dhëna për ecurinë e vendeve të tjera të rajonit.

Si arriti Serbia para të gjithëve për vaksinimin

BBC shkruante pak ditë më parë një artikull se si Serbia ia kishte dalë të arrinte në krye të Europës sa i përket fushatës së vaksinimit.

“Kryeministrja e arsimuar në SHBA e Serbisë ishte udhëheqësja e parë europiane që mori vaksinën Pfizer-BioNTech. Ministri rusofil i punëve të brendshme të vendit hapi krahun për të administruar dozën e Sputnik V. Dhe ministri i shëndetësisë u shfaq duke bërë injeksionin me vaksinën kineze Sinopharm. Këto foto-opsione ishin një mënyrë për të qetësuar një popullatë skeptike serbe për sigurinë e vaksinimeve. Por ata gjithashtu ilustruan një qasje të gjithëanshme ndaj prokurimit të tyre, që e ka vendosur Serbinë në krye të garës për të vaksinuar njerëzit në Evropën kontinentale”.

“Pavarësisht nëse [vaksinat] vijnë nga Kina, SH.B.A. ose BE – ne nuk na intereson për sa kohë që ato janë të sigurta dhe ne i marrim ato sa më shpejt të jetë e mundur,” tha kryeministrja Ana Brnabic. “Për ne, vaksinimi nuk është një çështje gjeopolitike. Është një çështje e kujdesit shëndetësor.”

Një përqasje e tillë, shkruan BBC, ka dhënë frytet e veta. Vendet e tjera në Ballkanin Perëndimor kanë hasur vështirësi në sigurimin e furnizimit me vaksina, duke i varur shpresat e tyre tek BE ose në skemën ndërkombëtare Covax. Në të kundërt, Serbia duket se synon të vaksinojë të paktën një të dhjetën e popullsisë së saj brenda shkurtit.

Vendi është gjithashtu përpara të gjitha 27 vendet anëtare të BE – duke kryer vaksinime me dyfishin e shpejtësisë së Gjermanisë, Spanjës dhe Italisë dhe katër herë më shpejt se Holanda.

Ndërsa Kryeministrja mund të këmbëngulë se nuk ka vend për gjeopolitikë kur bëhet fjalë për koronavirusin, marrëdhëniet e ngrohta të Beogradit me Pekinin dhe Moskën padyshim kanë ndihmuar në sjelljen e sasive të vaksinave për të cilat vendet e BE mund të kenë zili.

“Do të isha po aq e lumtur nëse do të merrnim një milion vaksina nga Pfizer,” thotë zonja Brnabic. “Por politika jonë e jashtme u shpagua; Unë mendoj se ishte e zgjuar dhe duhet të them se jam krenare për atë që arritëm.”

“Ne nuk jemi një anëtar i BE, dhe me gjithë solidaritetin që ka në BE, jemi të detyruar të jemi të fundit që të marrim vaksinat nga BE. Kjo është e keqja e të mos qenurit një anëtar i BE, dhe fokusi strategjik i tim qeveria mbetet pranimi në BE “.

Por në këtë moment krize, mosbesimi te Brukseli për prokurimin e vaksinave ka qenë një përfitim për Serbinë. Në Qendrën e Tregtisë Botërore në Beograd, njerëzit që janë regjistruar në internet ecin shpejt në radhë për të marrë dozat e tyre të vaksinës, shkruan BBC.

Në botë kryeson Izraeli

Në gjithë botën, pak më shumë se 172 milion njerëz kanë marrë dozën e tyre të parë të vaksinës Covid-19 deri në shkurt 2021, ose 2.2 për çdo 100 njerëz. Tetë vaksina janë aktualisht në përdorim në të gjithë botën, të gjitha këto kërkojnë dy doza.

Në botë kryeson për vaksinimin Izraeli (78 doza për 100 banorë), e ndjekur nga Emiratet e Bashkuara Arabe (rreth 52 doza), dhe të tretët renditen Mbretëria e Bashkuar, të ndjekur nga Serbia, që renditet e katërta në botë.

Në Izrael, të dhënat tregojnë se vaksinimi po jep efekt. Një studim i fundit izraelit gjeti se rastet me Covid-19 dhe shtrimet në spital ranë në mënyrë dramatike dhe të shpejtë midis njerëzve që u vaksinuan. Dhe të dhënat e hershme sugjerojnë që vaksinat po funksionojnë pothuajse po aq mirë në praktikë sesa ato në provat klinike. “Ne themi me kujdes, magjia ka filluar,” shkroi në Twitter Eran Segal, një biolog në Institutin e Shkencës Weizmann dhe bashkautor i një studimi të ri mbi ndikimin e vaksinës në Izrael.

Shqipëria, vaksinim për 14 muaj

Kryeministri Rama deklaroi dje se brenda 14 muajsh do të kryhet i gjithë procesi i vaksinimit në vend. Do të kryhen 300 deri në 500 vaksinime në ditë, shtoi ai. Presim nga dita në ditë konfirmimin për marrëveshjen e 360 mijë dozave të AstraZenenca.

Më herët, qeveria njoftoi se ka arritur një marrëveshje për 500 mijë doza me Pfizer, por pjesa më e madhe e tyre do të mbërrijnë në vjeshtë-dimër.

Pandemia e ka rritur ndjeshëm vdekshmërinë në vend. Të dhënat zyrtare të Gjendjes Civile kanë bërë të ditur se në 2020-n kanë humbur jetën rreth 28 mijë persona, ose rreth 6 mijë persona më shumë (+27%) se mesatarja e 2015-2019.

Situata ka qenë më e rënduar në nëntor dhe dhjetor, ku fatalitetet janë dyfishuar, duke shënuar rritje rekord në Europë. Tendenca rritëse ka vijuar dhe në janar, me rreth 600 jetë të humbura më shumë, me rritje 31% nga janari i 2020, ndërsa vlerësohet se situata ka ardhur drejt përkeqësimit në shkurt, pas përhapjes së valës së re të pandemisë.