S’ka marrëveshje për votën e diasporës dhe listat zgjedhore

Votimi i diasporës dhe pastrimi i listave zgjedhore, kanë qenë dy pikat për të cilat të martën kanë diskutuar grupet punuese ndërpartiake për implementimin e Marrëveshjes së 2 qershorit për daljen e Maqedonisë nga kriza politike.

Takimi i këtij grupi ka përfunduar pa asnjë deklaratë për mediat. Jozyrtarisht  mësohet se grupet e punës nuk kanë arritur pajtueshmëri konkrete për ndonjë pikë të marrëveshjes.

Edhe më tej më e thellë mbetet papajtueshmëria lidhur me pastrimi i listës zgjedhore, regjistrimin e popullsisë dhe mënyrën e zbatimit të zgjedhjeve në diasporë.

Siç raportojnë mediat, në takimin e të martës të grupit të punës të përbërë nga deputetët e partive nënshkruese të marrëveshjes, është debatuar për regjistrimin aktiv të votuesve si dhe për zgjedhjet e ardhshme parlamentare, të cilat duhet të mbahen në prill të viti të ardhshëm.

Ndërkohë, pritet që grupet e punës të fillojnë diskutimet edhe lidhur me korrigjimin e Kodit Zgjedhor, modelin zgjedhor, njësitë zgjedhore si dhe përbërjen e Komisionit Shtetëror të Zgjedhjeve.