Skandali i vaksinave në Kinë, ndëshkohen 357 zyrtarë
357 zyrtarë do të ndëshkohen në Kinë lidhur me skandalin që përfshin shitjen e paligjshme të vaksinave.
Agjencia e lajmeve Xinhua bëri të ditur se 192 çështje penale ishin hapur lidhur me rastin që ka të bëjë me shpërndarjen në 59 insitucione shëndetësore të vaksinave të ruajtura e transportuara në mënyrë të papërshtatshme.
Qeveria është zotuar të ashpërsojë procedurat lidhur me menaxhimin e vaksinave. Seria e vaksinave të paligjshme ka qenë në operim që prej vitit 2011 dhe në prill të vitit 2015 dy gra u arrestuan për shitjen e vaksinave me vlerë prej 88 milionë dollarësh. Por detajet u bënë publike vetëm një muaj më parë, kur autoritetet i kërkuan furnitorëve t’i ndihmonin ata në gjetjen e viktimave të mundshme.
Autoritetet shëndetësore u bënë thirrje njerëzve të mos heqin dorë nga vaksinimet. Sipas zyrës së OBSH-së në Kinë, vaksinat duhet të menaxhoheshin siç duhet ose në të kundërtën humbisnin efikasitetin. Por, ajo theksoi se ruajtja e tyre në mënyrë të papërshtatshme nuk i bënte ato të rrezikshme.
