Sllobodan Petroviq u sulmua nga zyrtarët e Lista Srpska 8 ditë pasi Vuçiq e shpalli tradhtar

Presidenti i Serbisë, Aleksandër Vuçiq nuk ka shumë kohë që e ka shpallur tradhtar deputetin e Kuvendit të Kosovës, Sllobodan Petroviq. Madje, akuza të njejta për të pati edhe Lista Serbe. Për këtë temë, Petroviq, foli publikisht për mediat kosovare e presidentit serb ia dërgoi edhe një letër publike. Për rastin ndërkaq të informuar janë edhe Bashkimi Evropian. Megjithatë, sot në mes të ditës, në njërin nga restorantet e Prishtinës, Petroviq u sulmua nga dy persona që dyshohet të jenë anëtarë të Listës Serbe, e këta të fundit tashmë janë vënë nën pranga nga Policia e Kosovës.

Presidenti i Serbisë, Aleksandër Vuçiq,  deputetit serb të Kuvendit të Kosovës Sllobodan Petroviq ia kishte hedhur disa akuza, sidomos lidhur me kalimin e Ushtrisë në Kuvend e Dokumentit për Platformën e Dialogun Kosovë-Serbi, për të cilat e akuzonte këtë të fundit se e kishte ndihmuar me votë.

Madje, atë e kishte shpallur edhe tradhtar dhe jo serb, që proteston kundër shtetit të Serbisë dhe kundër Listës Serbe.

Ai siç tha Vuçiq, ishte personi i 61-të që votoi platformën për dialog në Kuvendin e Kosovës.

“A e dini se kush e nënshkroi (ose mbrojti) letrën më të poshtërsuar ndaj serbëve në dekadat e fundit? Serbi dha votën, dhe ai ishte i 61-ti në Kuvendin e Kosovës. Ai serb është Sllobodan Petrovic, i cili është një person që proteston kundër shtetit të Serbisë dhe kundër Listës Serbe, të cilën populli jonë e zgjodhi në mënyrë legjitime dhe ua dha votën,” ishte deklaruar Vuçiq.

Për të njëjtat tema, e kishin akuzuar përmes një komunikate për media edhe Lista Serbe, duke thënë se nga Petroviq ishte distancuar edhe Oliver Ivanoviq.

Për këtë rast, vetë Petroviq i kishte dërguar një letër të hapur Vuçiqit, ndërkaq, deklaratat e të parit të Serbisë i cilësonte si kërcënime që i lidhte edhe me vrasjen e Oliver Ivanoviqit.

“Tashmë jam bërë shënjestër bashkë me njerëzit me të cilët punoj si dhe familja, kam menduar se pas vrasjes së Oliver Ivanoviqit që ishte tragjedi ata që e vunë atë në shenjë morën mësime, por duket se e kam mashtruar veten”, u deklarua ai për Tv Klanin e Kosovës.

Megjithëse për këto kërcënime është folur se ka ndërhyrë edhe Bashkësia Ndërkombëtare, sot në mes të ditës në afërsi të objektit të Kuvendit, Petroviq u sulmua nga dy persona të cilët dyshohet se janë nga Lista Serbe.

“Në orën 10:30 kemi marrë informatën për nje mosmarrëveshje në rrugën “Fazli Grajqevci” në Prishtinë. Për këtë rast në polici janë shoqëruar tre persona. Policia dhe prokurori i rastit po punojnë për këtë rast”, sqarojnë nga policia e Kosovës”, kanë bërë të ditur nga Policia.

Pak pas rastit, vetë Petroviq doli para mediave duke deklaruar edhe një herë se sulmi i tij është si rrjedhojë e disa deklaratave që kishte dhënë në një emision të mëngjesit për ish-ministrin e Bujqësisë, Nenad Rikallo.

“Milan Kostiq është personi që më sulmoi”, deklaroi Petroviq