Tahiri: Për ndërtimet në veri s’kemi biseduar në Bruksel

Ministrja për dialog, Edita Tahiri ka thënë se për ndërtimet në veri është përgjegjëse Ministria për Mjedis, e jo ministria që udhëheqë ajo.

Mirëpo ajo është përgjigjur në pyetjet e deputetit nga Vetëvendosje, Ismajl Kurteshi i cili ka shprehur shqetësim për ndërtimet në veri të përkrahura nga Qeveria e Serbisë.

“Çështja e ndërtimeve nuk ka qenë temë në dialogun e Brukselit, kjo çështje është biseduar në Kosovë dhe në përpjekjet e tyre për të gjetur zgjidhje për ndërtimet është diskutuar dhe ka dalë një memorandum bashkëpunimi i cili ende nuk është nënshkruar nga ana e kryetarit të komunës së Mitrovicës në veri, Goran Rakiq”, tha Tahiri.

Ajo tha se ndërtimet në veri nuk kanë qenë asnjëherë temë e bisedimeve në Bruksel.