Thaçi: Patjetër të votohet Ligji kundër pjesëmarrjes në luftëra të huaja
Zëvendëskryeministri i Kosovës, njëherësh edhe ministër i Punëve të Jashtme, Hashim Thaçi, ka kërkuar nga deputetët e Kuvendit të Kosovës që ta votojnë patjetër Ligjin kundër pjesëmarrjes në luftëra të huaja.
Sipas Thaçit, jo vetëm Kosova, por e gjithë bota është duke u përballur me këtë problem.
“Ky projektligj është një domosdoshmëri pasi është i një rëndësie të veçantë për Kosovën. Është një kërkesë për tu përballur me përmasat globale që nuk kursen asnjë shtet të botës. Numri i luftëtarëve që kanë shkuar nga Kosova është shqetësues duke pasur parasysh proporcionin e popullsisë. As Kosova nuk ka qenë imune për këtë problem, prandaj edhe implikimet e tilla janë barrë e madhe për shtetin”, ka thënë Thaçi në Kuvendin e Kosovës, raporton “Zëri”. Ai më tej tha se personat të cilët shkojnë në Siri e Irak për të luftuar, janë rrezik për vendin.
“Këta persona janë shqetësim për sigurinë tonë kombëtare me kërcënimin që ata paraqesin me kthimin e tyre radikale etj. Ligji është modern, Kosova ka dëshmuar se është e pa kompromis dhe është lidere në rajon kundër ekstremizmit, radikalizmit dhe elementëve të tjerë terrorist”, ka thënë Thaçi.
Ai ka thënë se deklarata e sekretarit amerikan, John Kerry si dhe mbështetja që SHBA-të dhe shtetet e tjera që i japin Kosovës për të krijuar mekanizma kundër kësaj rryme fetare, është përgjegjësi e Kosovës që ta miratoj sa më shpejt këtë ligj.
