Tiranë, arrestohet një 24-vjeçar nga Elbasani, dyshohet si vrasës me pagesë
![](https://24-ore.com/wp-content/uploads/2015/02/10d-1.jpg)
Një 24 –vjeçar nga Elbasani është arrestuar sot pas një operacioni të mirëorganizuar nga Policia e Tiranës, me dyshimin e fortë se është vrasës me pagesë. I riu është kapur në flagrancë në orët e para të mëngjesit, gjatë kohës që ishte duke udhëtuar me mjetin e tij në Unazën e Re, kryeqytet.
Ndërkaq policia ushtroi kontrolle në banesën ku 24-vjeçari jeton në Tiranë dhe në lokalin që administrohet prej tij. Nga të dhënat paraprake mësohet se janë gjetur një arsenal i konsiderueshëm armësh. Forca të RENEA-s, kanë shkuar sot në drejtim të Elbasanit për të ribërë kontrolle në banesën tjetër të tij.
Gjithashtu forcat speciale janë nisur edhe në drejtim të Durrësit sepse dyshohet se ai ka një tjetër banesë në qytetin bregdetar. Policia ende nuk ka dhënë detaje më të gjera rreth arrestimit apo identitetit të të arrestuarit, për çështje hetimore