“Topi i Artë 2023” është i Arinaldo Rrapaj: mesfushori i Partizanit mund golat e Hasanit dhe Balajt
Arinaldo Rrapaj është fituesi i “Topit të Artë” për vitin 2023, duke u shpallur kështu futbollisti më i mirë në Shqipëri. Në ceremoninë e zhvilluar në “Teatrin Kombëtar të Operas dhe Baletit” mbrëmjen e sotme, Rrapaj u shpall futbollisti më i votuar mes kandidatëve të tjerë, Florent Hasani dhe Bekim Balaj.
Ky është “Topi i Artë” i parë në karrierën e mesfushorit të Partizanit. Mesfushori vazhdon të bëjë performanca të rëndësishme, duke mundur edhe golat e shumtë të Florent Hasanit dhe kapitenit të Vllaznisë Balaj. Ky çmim iu dorëzua atij nga i ftuari special i FSHF-së në Mbrëmjen Gala, ish-kampioni i Botës me Italinë, Ambasadori i UEFA-s, Gianluca Zambrotta, i cili u shpreh i lumtur që ishte pjesë e kësaj mbrëmje magjike.
Fituesi i “Topit të Artë” Arinaldo Rrapaj u shpreh i emocionuar që është vlerësuar me këtë çmim: “Për mua është një emocion shumë i veçantë. Dua të falënderoj FSHF-në dhe njerëzit që kanë votuar për mua. Falënderoj Partizanin, Presidentin Demi dhe shokët e ekipit pa të cilët nuk do të isha këtu sot. Falënderoj sidomos familjen time, që më ka qëndruar pranë gjithmonë në momente të mira dhe të këqija. Këtë trofe ua dedikoj atyre” – tha Rrapaj.
