Trump zbut retorikën ndaj myslimanëve

Kandidati presidencial republikan Donald Trump duket se po e zbut qëndrimin e tij ndaj myslimanëve.

Në përgjigje të vërejtjeve të kryebashkiakut të porsazgjedhur të Londrës, Sadiq Khan, manjati njujorkez tha se deklarata për t’iu ndaluar atyre përkohësisht hyrjen në Shtetet e Bashkuara ishte thjesht një “sugjerim”.

Propozimi polemizues i Trump erdhi pas sulmeve të Parisit nëntorin e kaluar, ku humbën jetën 130 vetë. Për Khan, i shqetësuar se nuk do të mund të udhetojë drejt Shteteve të Bashkuara të Amerikës për shkak të besimit të tij, Trump u ofrua të bënte një përjashtim, të cilin kryebashkiaku mysliman i Londrës e refuzoi shumë shpejt.

“Nuk do jem përjashtimi mysliman i Donald Trump”, ishin fjalët e Khan, që këndvështrimin e biznesmenit nga Nju Jorku e konsideron “injorant” dhe thotë se mund ta bëjë si Amerikën ashtu dhe Britaninë e Madhe më të pasigurtë.

Pretendimet e Trump u kritikuan ashpër në Shtetet e Bashkuara e përtej tyre dhe ai vetë deri tani i ka qëndruar propozimit me argumentin se është i nevojshëm për sigurinë e vendit.

Të mërkurën megjithatë, Trump tha per Fox News se, bëhet fjalë për një ndalim të përkohshëm, një sugjerim, siç u shpreh ai, derisa të mësojmë se çfarë po ndodh realisht.

Politikani kontrovers ka marrë pozicione të ashpra edhe në të kalurën për çështje të caktuara vetëm për t’i ndryshuar pastaj pak ditë me vonë.