Një ilaç me bazë bimore po ndryshon luftën kundër duhanit

Lënia e duhanit ka qenë gjithmonë një sfidë e vështirë, por sot ekzistojnë metoda më efektive se kurrë më parë. Një prej tyre është citisina, një substancë me origjinë bimore që po fiton gjithnjë e më shumë vëmendje në Europë për rolin e saj në luftën kundër varësisë nga nikotina, sipas Euronews.com.
Që nga fundi i marsit, sistemi shëndetësor në Itali ka filluar të rimbursojë ilaçet me bazë citisine, duke e bërë këtë terapi më të aksesueshme për pacientët. Megjithatë, përdorimi i saj nuk rekomandohet i vetëm: trajtimi duhet të kombinohet me mbështetje psikologjike dhe terapi të sjelljes për të rritur shanset e suksesit.

Citisina vepron drejtpërdrejt në receptorët e nikotinës në tru, duke “mashtruar” mekanizmin e varësisë. Ajo redukton kënaqësinë që jep duhani dhe njëkohësisht zbut simptomat e abstinencës. Kjo do të thotë se personi nuk ndjen më të njëjtin dëshirë për cigare dhe e përballon më lehtë procesin e lënies.

Të dhënat shkencore janë premtuese. Një studim në Itali tregoi se 32.1% e personave që përdorën citisinën arritën të linin duhanin pas një viti, krahasuar me vetëm 7.3% të atyre që ndoqën vetëm terapi psikologjike. Kjo tregon qartë se kombinimi i metodave është çelësi i suksesit.

Megjithatë, ekspertët theksojnë se terapia e sjelljes mbetet vendimtare. Ajo ndihmon në identifikimin e zakoneve të përditshme që lidhen me duhanin, si cigarja pas kafes apo gjatë stresit, dhe në ndryshimin e tyre. Ilaçi ndikon në trup, ndërsa terapia në mendje – dhe bashkë ato japin rezultatet më të mira.

Duhanpirja mbetet një nga faktorët kryesorë të rrezikut për kancerin e mushkërive dhe shkakton miliona vdekje çdo vit në nivel global. Për këtë arsye, çdo përpjekje për ta lënë nuk është vetëm një zgjedhje personale, por një investim i rëndësishëm për shëndetin.
Përveç citisinës, ekzistojnë edhe metoda të tjera si zëvendësuesit e nikotinës (patch, çamçakëz), vareniklina dhe bupropioni. Ndërkohë, teknika alternative si meditimi, hipnoza apo aplikacionet digjitale mund të ndihmojnë, por zakonisht nuk janë aq efektive kur përdoren të vetme.  /Ad.Ab./