UNESCO ndërmjetëson kërkesën greke për skulpturat e Partenonit

Një delegacion grek, i përbërë nga përfaqësues të Ministrisë së Kulturës dhe asaj të Jashtme si dhe nga presidenti i Muzeut të Akropolit, u takua me përfaqësues të qeverisë britanike si dhe të Muzeut Britanik, në kuadër të “Komisionit ndërqeveritar të UNESCO-s për rikthimin e objekteve kulturore në vendet e origjinës”, për të diskutuar çështja e skulpturave të Partenonit, një çështje që ndodhet në rend të ditës që nga viti 1984.

Sipas Ministrisë së Kulturës, gjatë takimit, u diskutua edhe ftesa që UNESCO-ja i drejtoi qeverisë britanike pas kërkesës së palës greke në vitin 2013, me qëllim që të fillojë ndërmjetësimi mbi bazën e rregullave të UNESCO-s.

Ftesa ishte bërë në gusht 2013 dhe deri më tani nuk është dhënë përgjigje nga pala britanike. Kërkesa e drejtë e Greqisë për kthimin dhe ribashkimin e skulpturave të Partenonit, por edhe ftesa e UNESCO-s u mbështetën nga shumë shtete, me deklarata gjatë mbledhjes së komisionit ndërqeveritar.

Takimi ndërmjet përfaqësuesve grekë dhe britanikë konkludoi në një rekomandim që u mbështet nga plenumi i komisionit ndërqeveritar. Ky rekomandim e fton Britaninë që të shqyrtojë propozimin për ndërmjetësim të UNESCO-s, me qëllim që të zhvillohen më shumë takime në shërbim të zgjidhjes së kësaj çështjeje.