Vasili: Debati për buxhetin nuk do të jetë i plotë pa opozitën
Kryetari i grupit parlamentar të Lëvizjes Socialiste për Integrim, Petrit Vasili deklaroi të dielën se buxheti i vitit 2015 ruan fytyrën e fortë sociale, ndërsa përfshirja e drejtpërdrejtë e opozitës në debat do të ishte konstruktive. “Maxhoranca u përfshi në diskutimin e buxhetit me përgjegjshmëri maksimale dhe debatoi për çdo zë dhe çdo element të buxhetit duke riorientuar vendosjen e çdo paraje publike me sa më produktivitet. Por është e qartë se debati do të ishte më i plotë dhe s’mund të jetë krejtësisht i plotë pa praninë dhe pjesëmarrjen e drejtpërdrejtë të opozitës, si e ngarkuara nga votat shqiptare për të bërë debatin dhe kritikën konstruktive të buxhetit”, tha Vasili.
Ndërkohë, ai vlerësoi se buxheti i vitit 2015 është në shërbim të objektivave të qeverisë si zhvillimi i infrastrukturës, bujqësisë, apo mbështetja e sektorëve prioritarë si arsimi apo shëndetësia. “Është buxhet kyç sepse është buxheti i një viti që shënjon një orinetim drejt një ekonomie të qëndrueshme, pasi buxheti i vitit 2014 në përmbajtje të të cilit kishte element të emergjencës për arsye të gropës ekonomike, ishte buxhet urë drejt procesit të rimëkëmbjes”. theksoi Vasili. Sipas tij, buxheti 2015 rikthen besimin dhe orienton plane afatmesme dhe afatgjata shume më të mirëbazuara e të mirëorientuara.
