Vasili: Ndryshimet në ligjin për konçensionet garantojnë transparencën
Komisioni i Veprimtarisë Prodhuese ka diskutuar në mbledhjen e së mërkurës propozimin e Lëvizjes Socialiste për Integrim (LSI) për konçesionet.
Projektligji “Për disa shtesa dhe ndryshime në ligjin nr. 125/2013 “Për koncesionet dhe partneritetin publik privat”, të ndryshuar” është prezantuar nga deputetët Petrit Vasili dhe Përparim Spahiu.
Kryetari i Grupit Parlamentar të LSI-së, Petrit Vasili ka deklaruar se është më rëndësi kohëzgjatja e Partneritetit Publik-Privat, (PPP) .
Deputeti Vasili tha se, “Është me rëndësi kohëzgjatja e Partneritetit Publik-Privat. Ratifikimi i marrëveshjeve të tilla të bëhet në Parlament dhe në miratimin e kontratave të përfshihet Ministria e Financave dhe Avokatura e Shtetit”.
“Nisma jonë synon përmirësime në procesin e PPP-ve dhe rritje të transparencës për kontratat. Kemi qëllim të kuptohet dobia e Partneritetit Publik-Privat. FMN e BB kanë kërkuar disa herë të vlerësohet dobishmëria e PPP-ve”, tha Vasili.
Neni 4 i ligjit të ndryshuar propozon se për procedurat e koncesionit/partneritetit publik privat, kohëzgjatja e të cilave është mbi 4 vjet, kontrata hyn në fuqi pasi ratifikohet nga Kuvendi i Shqipërisë.
