Veseli në pozitën e re, mban mbledhjen e Kryesisë së Kuvendit
Kryetari i Kuvendit, Kadri Veseli të enjten ka mbajtur mbledhjen e Kryesisë. Në këtë mbledhje ishin të pranishme edhe shefat e Grupeve parlamentare.
Kryesia e Kuvendit ka caktuar dy seanca plenare një të hënën dhe tjetrën më 18 dhjetor.
Veseli, tha se seanca e 18 dhjetorit u caktua me kërkesë të presidentes Atifete Jahjaga, e cila do të bëjë raportimin vjetor para deputetëve.
Ndryshe, pas kritikave të shumta se ish kreu i Shërbimit të Inteligjencës së Kosovës, ka ardhur në krye të Kuvendit, Veseli mbrëmë i është përgjigjur kritikave të tilla.
“Një nga presidentët më të veçantë të SHBA-ve, presidenti George Bush, ka qenë drejtor i CIA-s”, ka thënë Kadri Veseli.
Në emsionin Zona B, të Klan Kosovës, Veseli ka theksuar se posti i kryetarit të parlamentit të Kosovës, është vazhdimësi e aktiviteteve të tija politike.
“Në jetën time jam ballafaquar me shumë përgjegjësi dhe vendime të mëdha që kanë pasur të bëjnë me vendin. Edhe kjo është një vazhdimësi, natyrisht në rrethana tjera. Është një çështje e besimit dhe ishte vendim individual”, ka thënë Veseli
