Vizita e Ambasadorëve të NATO’s në Prishtinë: Si refuzon t’i njohë institucionet e Kosovës kjo organizatë

Ajo që ka rënë në sy gjatë vizitës së sotme, është fakti që delegacioni i udhëhequr nga zëvendëssekretarja gjenerale e NATO’s Rose Gotenmoeller se zyrtarëve të Kosovës u është referuar vetëm me emra personal, pa përmendur pozitat, duke u kujdesur që të mos paragjykohet asgjë rreth shtetësisë së Kosovës.

Kështu, numri dy i NATO’s Presidentit Thaçi nuk i është referuar me postin që mban por vetëm me ” z.Thaçi”.

Kjo zyrtare megjithatë Presidentin e Kosovës e ka takuar në Zyrën e këtij të fundit ku ishin ekspozuar flamujt e Kosovës dhe NATO’s.

Një takim është paralajmëruar edhe Kryeministrin Ramush Haradinaj. Edhe këtij të fundit NATO i drejtohet vetëm me emër, pa ia permendur pozitën që mban. Qeveria e Kosovës nuk ka lëshuar ndonjë njoftim rreth këtij takimi.

Në takimin e ambasadorëve të NATO’s me përfaqësues të  pranisë ndërkombëtare  në Kosovë ka marrë edhe Ministri i FSK’së Rrustem Berisha.

Edhe këtij të fundit NATO nuk ia njeh pozitën – nuk e ka prezantuar si ministër në njoftimin për media por vetëm si përfaqësues të FSK’së.

E gjithë kjo situatë ka ndryshuar gjatë ditës kur ambasadorët e SHBA’së dhe Britanisë së Madhe kanë ardhur në Kuvendin e Kosovës për ta takuar Presidentin Thaçi dhe Kryeministrin Haradinaj. Këto vende tashmë dihet që e kanë njohur pavarësinë e Kosovës.

Ndryshe Presidenti Thaçi në një intervistë të premten mbrëma ka shfaqur shqetësime edhe për Bashkimin Europian që sipas tij përfaqësuesit nga Kosova nuk po i pret siç duhet duke mos e vendosur flamurin e Kosovës në zyrat e BE’së kur ka vizita të zyrtarëve nga Kosova.