Vrau ndërtuesin, prokuroria kërkon 35 vjet burg për autorin

Prokuroria e Shkodrës ka kërkuar dënimin me 35 vjet burg për Shpëtim Sadikun, i akuzuar për vrasje me paramendim për hakmarrje. Ngjarja ka ndodhur më 20 nëntor të vitit 2013, në vendin e quajtur Ura Dervishbeg, në qytetin e Shkodrës.

Sipas hetimeve të Prokurorisë së Shkodrës, rezulton se viktima, Palok Lazri ka pasur një konflikt me vëllain e autorit, për shkak të një borxhi që nuk ia kishte kthyer. Viktima ishte ndërtues dhe vëllai i autorit, shtetasi Ardit Sadiku punonte tek kompania e Lazrit si roje dhe shofer.

Ardit Sadiku kishte pretendimin se shtetasi Lazri i kishte detyrim rreth 100 mijë lekë, për punën e kryer dhe të papaguar. Raportet mes Palok Lazrit dhe vëllait të autorit kishin qenë konfliktuale edhe përpara ngjarjes së nëntorit 2013, madje në një rast, vëllai i autorit e ka qëlluar me thikë të vogël Lazrin në vitin 2012 dhe për këtë ishte dënuar me 8 muaj heqje lirie.

Pavarësisht dënimit, raportet ndërmjet Lazrit dhe vëllait të autorit, Ardit Sadiku, kanë vijuar të jenë konfliktuale, pasi pagesa që pretendohej ende nuk ishte kryer.

Ky konflikt i zgjatur në kohë, konsiderohet nga Prokuroria e Shkodrës si arsyeja kryesore që Shpëtim Sadiku, më 20 nëntor të 2013-s, ka ndjekur lëvizjet e Lazrit dhe e ka qëlluar tre herë me pistoletë, duke i shkaktuar vdekjen e menjëhershme.

Hetimet ndaj autorit të dyshuar janë kryer me masën e sigurimit “arrest në burg” ndaj tij.