Zaganjori: Duhet ndërhyrje, të ulet numri i çështjeve në Gjykatën e Lartë

Kreu i Gjykatës së Lartë, Xhezair Zaganjori, ka përsëritur edhe sot mbështetjen e tij ndaj reformës në drejtësi.

I pranishëm në Tryezën e Rrumbullakët të organizuar nga Ministria e Drejtësisë me temë “Reforma në Sistemin e Drejtësisë, Pavarësia, Llogaridhënia dhe Profesionalizmi”, Zaganjori theksoi se kjo reforme na imponohet nga kërkesat e kohës. “Kemi një sistem drejtësie të sëmurë qe duhet kuruar. Jemi dakord që duhet reformë dhe për këtë kemi ngarkuar specialistët më të mirë të Gjykatës së Lartë për të folur në emër tonë mbi pikat ku duhet ndërhyrë”, tha Zaganjori.

Sipas Kreut të Gjykatës së Lartë, numri i çështjeve në rekurs është tepër i lartë dhe për këtë duhet ndërhyrë. “Volumi i punës së Gjykatës së Lartë është mjaft i lartë dhe një nga pikat ku duhet ndërhyrë është pikërisht rishikimi i çështjeve për rekurs”, tha Zaganjori. Sipas tij, ndërhyrja duhet te jete e gjithanshme. “Modelet janë të gatshme. Nuk kemi nevojë të krijojmë ne modele të reja. S’kemi nevojë të shpikim, pasi mjafton të adoptojmë modelet dhe sistemet e partnerëve tanë europiane dhe mund të rivitalizojmë sistemin e drejtësië, duke e bërë atë më efiçent”, nënvizoi Kreu i Gjykatës së Lartë, Xhezair Zaganjori.