Zgjedhjet në Francë, Macron fiton debatin e fundit me Le Pen

Kandidatët për presidentë në Francë, Emmanuel Macron dhe Marine Le Pen kanë zhvilluar mbrëmë debatin e fundit televiziv, para zgjedhjeve të së dielës.

Për 2 orë, ata diskutuan për terrorizmin, ekonominë dhe Europën. Kundërshtarët shkëmbyen fyerje mes tyre, por pëlqimin e publikut në fund e mori Macron, i cili është shfaqur shumë më bindës në thuajse të gjitha kategoritë.

Ai arriti të ishte më konkret në planet e tij për Francën. Pas debatit, 63 për qind e shikuesve votuan për të.

Marine Le Pen e kritikoi rivalin e saj për mungesën e eksperiencës politike, si edhe për të kaluarën me sfond financiar, duke e cilësuar si kandidatin e globalizimit të egër.

Macron u kundërpërgjigj duke thënë se liderja e Frontit Nacional gënjen haptazi, nuk propozon asgjë konkrete dhe fryn shqetësimet e publikut.