Zjarri masiv në Dardhë, Koka: Mund të jetë i qëllimshëm

Zjarri masiv i cili prej 5 ditësh vijon të shkrumbojë pyjet në zonën e Dardhës ka sjellë edhe reagimin e ministrit të mjedisit Lefter Koka.

Teksa ka qenë në qytetin juglindor ministri Koka nuk e ka përjashtuar mundësinë e zjarrvënies së qëllimshme, apo nga pakujdesia. Ai tha se për këtë viti 2016 na gjen me masa shumë herë më shtrënguese të ndërmarra për mbrojtjen e kësaj pasurie natyrore.

Mbi 35 hektarë me pyje dhe bimësi të ulët janë përshkuar nga zjarri në pak ditë duke shkaktuar një dëm të parikuperueshëm ndërsa sipas ministrit Koka pavarësisht kësaj situate do të vijojë puna për të parandaluar shkatërimin e pyjeve mes instancave dhe do të ndërmeren masa të mëtejshme.

“Unë besoj që në këtë stinë të ftohtë shkaktari i vetëm është dora e njeriut. Ndoshta ndryshe nga sezoni veror, ku temperaturat janë të larta, në këtë rast besoj se ka pakujdesi ose në mënyrë të qëllimtë”, tha Lefter Koka, ministër i Mjedisit.

5 ditë më parë në zonën e Dardhës u konstatuan 5 vatra zjarri të cilat dogjën pisha dhe drurë të tjerë në zonë duke shkaktuar një dëm të madh. Terreni i vështirë malor bëri që të vështirësohej menaxhimi i situatës duke bërë të domosdoshme ndërhyrjen nga ajri, ndërkohë që njëra vatër në zonën e Bigëllës vijon të jetë ende aktive.