Zonat e mbrojtura, projektet private duhet të marrin miratimin e Këshillit Kombëtar të Territorit

Në seancën plenare të ditës së sotme që ishte e fundit për këtë legjislaturë u miratua projektligji “Për Zonat e Mbrojtura”.

Qëllimi është që të përmirësojë kuadrin ligjor aktual të Zonave të Mbrojtura si një domosdoshmëri ndaj rritjes së kërkesave të menaxhimit dhe mbrojtjes së këtyre territoreve, si dhe ndryshimit të legjislacionit europian në këtë fushë.

Për herë të parë në ligj është parashikuar që një investim privat në një zonë të mbrojtur nuk do të duhet të marrë vetëm miratim nga Ministria e Mjedisit, por do të duhet të kalojë për shqyrtim edhe në Këshillin Kombëtar të Territorit.
Nga ana tjetër parashikohet një kategorizim i zonave të mbrojtura nga ato rreptësishtë të ndaluara për aktivitete të ndryshme e deri tek ato ku do të mund të lejohen aktivitete të ndryshme.

Ligji “Për zonat e mbrojtura”, synon përmirësimin e disa elementeve dhe problematikave të vërejtura deri më sot. për Zonat e Mbrojtura duke synuar një menaxhim efektiv dhe të pavarur të të gjithë Zonave të Mbrojtura ekzistuese dhe ato që do të shpallen që nga hartimi i planit të menaxhimit të një zone e deri tek administrimi i vazhdueshëm i saj nëpërmjet menaxherëve që janë strukturat e vartësisë së Agjencisë Kombëtare të Zonave të Mbrojtura.

Ligji sjell vetëm përparësi në përfitimet që do të kenë Zonat e Mbrojtura, të shpallura aktualisht apo ato që do të shpallen në të ardhmen duke përcaktuar qartë procedurën e shpalljes së një zone të mbrojtur.

Projektligji “Për Zonat e Mbrojtura” ka kaluar përgjatë një viti në një sërë konsultimesh me publikun. Janë zhvilluar rreth 12 tavolina të rrumbullakta mbi të cilat është diskutuar drafti me përfaqësues të universiteteve dhe botës akademike, shoqërisë civile dhe përfaqësues të institucioneve të huaja dhe donatorëve.