Çelet klinika ligjore falas, Manjani: I vjen në ndihmë qytetarëve në nevojë
Është çelur sot në ambientet e Ministrisë së Drejtësisë, Klinika Ligjore Falas e cila në thelb të saj ka informimin e qytetarëve për nevojat e tyre ligjore. Klinika, do te jetë një zyrë që do t’i shërbejë qytetarëve të cilët janë në nevojë financiare, pensionistëve, personave me probleme dhe aftësi të kufizuara fizike.
Në ceremoninë e çeljes së zyrës, Ministri Manjani tha se kjo ishte një nga ambiciet e punës së tij. “Jam gjashtë muaj në detyrë dhe ndihem krenar që kam arritur të hap këtë zyrë. Ne do bëjmë dhe ndërmjetësim përmes kësaj zyre. Kjo e fundit do të jetë mjaft simpatike si çështje, pasi ne do jemi një urë komunikimi mes qytetarëve në nevojë dhe gjykatës, duke sjellë në kohë të shpejtë zgjidhjen e çështjeve”, tha Manjani. Ai u shpreh se kjo është një ambicie e madhe e institucionit që ai drejton dhe nuk do të ndalet këtu…
Ministri Manjani foli dhe për çështjen Balili, duke u shprehur se në rast se do të kishte urdhër ndalimi për personin në fjalë, institucionet drejtësivënëse do e kishin bërë një gjë të tillë. Ai foli dhe për çështjen e kryetarit të ish Bashkisë së Dibrës, Shukri Xhelil, duke thënë se qeveria flet vetë. “Qeveria flet vetë. Mendoj se skandale të tilla duhet marrin ndëshkim shembullor. Prokuroria po bënë procedurat e duhura”, vijoi Manjani.
