Boko Haram në krizë, rritet përdorimi i fëmijëve në atentate
Përdorimi i fëmijëve kamikazë nga grupi terrorist Boko Haram u rrit vitin e kaluar me ritme të shpejta, aq sa një në 5 atentate vetëvrasëse kryheshin nga fëmijë.
Kështu thotë një raport i OKB, sipas të cilit edhe vajzat u përfshinë në aksione të tilla, duke kryer tre të katërtat e sulmeve të marra përsipër gra grupi islamik në Kamerun, Nigeri dhe Çad.
Bëhet fjalë për një 11-fishim të sulmeve, nga 4 që ishin në vitin 2014 në 44 në vitin pasardhës. Ndryshimi i taktikës, sipas ekspertëve, reflekton humbjen e territorit në Nigeri nga Boko Haram.
Rebelimi 7-vjeçar, që ka prekur kryesisht veri-lindjen e Nigerisë por edhe fqinjët e saj, ka lënë rreth 17 mijë persona të vdekur. UNICEF thotë se deri në 1.3 milion fëmijë janë marrë me forcë nga shtëpitë e tyre në katër vende, Kamerun, Çad, Nigeri dhe Niger.
Raporti i agjencisë së OKB-së për fëmijët është publikuar në një kohë kur po bëhen dy vjet nga rrëmbimi i mbi 200 vajzave nga militantët e Boko Haram në qytetin Çibok.
Rrëmbimi i tyre shkaktoi një fushatë globale me thirrjen “Na ktheni vajzat tona”, por deri tani asnjë prej tyre nuk është gjetur.
Raporti thotë se, djemtë detyrohen nga militantët të sulmojnë familjen e tyre për të treguar besnikërinë ndaj Boko Haram, ndërsa vajzat bëhen pre e abuzimeve seksuale dhe detyrohen të martohen me luftëtarët.
