4 vjet nga vrasja e gjyqtarit, kolegët: Vrasja e Konomit mbjell ende terror mes nesh
Në katër vjetorin e vrasjes makabre të gjyqtarit të Vlorës, Skerdilajd Konomi, Unioni i Gjyqtarëve u bën apel autoriteteve që të hetojnë për të zbuluar dhe vënë para drejtësisë autorët. Gjatë një interviste për Top Channel, kreu i Unionit të Gjyqtarëve Gerd Hoxha e konsideron të pajustifikueshëm faktin që megjithë kohën që ka kaluar, nuk ka ende një version hetimor për krimin e tmerrshëm që i mori jetën gjyqtarit.
“Mendojmë që një kohë kaq e gjatë pa ndonjë informacion të qënësishëm nuk është e justifikueshme, por unë mendoj që në radhët e organeve ligjzbatuese, shumica janë njerëz të përkushtuar të cilët do të mundohen të gjejnë dhe të vënë para drejtësisë autorët, sepse Skerdi ka qënë një prej tyre. Kjo dhimbje bëhet dhe më e madhe sot nga mosgjetja e vënia para drejtësisë autorëve të këtij krimi monstruoz e me pasoja tejet të rënda, për gjithë jetën sociale ekonomike në vend, sigurinë, mirëqënien e qytetarëve dhe funksionimin normal të shtetit dhe shoqërisë shqiptare në tërësi. Unioni i Gjyqtarëve i Shqipërisë u bën thirrje organeve kompetente shtetërore të veprojnë me vendosmëri e përkushtim, për të gjetur dhe për të vënë para drejtësisë autorët e këtij krimi të shëmtuar. Gjithashtu Unioni i Gjyqtarëve të Shqipërisë u bën thirrje organeve shtetërore të ndalin retorikën fyese dhe armiqësore ndaj sistemit të drejtësisë dhe gjyqtarëve në veçanti, dhe të marrin masa të menjëhershme në drejtm të mbrojtjes, sigurisë së jetës së familjes së gjyqtarëve, përmirësim të kushteve të punës, të cilat shpeshherë, gjyqtarët pra, në mënyrë të padrejtë janë vënë në shënjestër të sulmeve verbale, fizike nga subjekte të ndryshme të policisë shqiptare”, thotë Gerd Hoxha, Unioni i Gjyqtarëve.
Për Unionin e Gjyqtarëve kjo ngjarje përcjell ende frikë tek gjyqtarët.
“Ai u vra barbarisht në një atentat terroristo mafioz në qendër të qytetit të Vlorës. Sulmi ndaj gjyqtarit Konomi ishte sulmi më i egër pas disa sulmeve të tjera verbale dhe fizike që i është bërë ndonjëherë sistemit gjyqësor në Shqipëri. Ky sulm me mënyrën, kohën dhe vendin e ekzekutimit të tij mbolli një klimë terrori të pashembullt duke synuar jo vetëm terrorizimin dhe frikësimin e sistemit gjyqësor, po mbi të gjitha goditjen, terrorizimin dhe frikësimin e gjithë sistemit të drejtësisë, agjencive të zbatimit të ligjit dhe cënimin e sundimit të ligjit në vend”, vijon Hoxha.
Nga ana tjetër bashkëshortja e Skerdilajd Konomit, ka vendosur këtë status në Facebook në të cilin shprehet: “4 vjet dhe askush nuk na ka bindur që jeta e njeriut që kërkon të drejtën e tij vlen më shumë se 400 gramë tritol në këtë vend”.
Çështja ndodhet që prej shtatorit 2014 në Prokurorinë e Krimeve te Rënda, ndërkohë që nga kontrolli i dosjeve gjyqësore që ka shqyrtuar gjyqtari Konomi rezulton, thonë burimet, se pista e vrasjes për shkak të dosjeve që kishte shqyrtuar apo kishte në shqyrtim është rrëzuar. Aktualisht prokurorët vijojnë të jenë në kërkim të provave për një pistë tjetër siç është ajo e betejës së pronësisë disa vjeçare që gjyqtari po ndiqte për disa hektarë toke në Hamallaj të Durrësit, tokë kjo e trashëguar nga të parët e tij.
