Ruajtja e pyjeve, prezantohet sistemi i ri elektronik
Është prezantuar paraditen e kësaj të premteje sistemi i ri elektronik për mbrojtjen e pyjeve, sipërfaqet e të cilave do të mbikëqyren me anë të kamerave.
Në fjalën e tij në këtë event, ministri i Brendshëm, Saimir Tahiri ka deklaruar se, prerja e paligjshme e pyjeve është një çështje që e ka shqetësuar qeverinë që në ditën e parë të punës.
“Prerja e pyjeve është një krim që vret të ardhmen e fëmijëve tanë, ndaj e konsiderojmë prioritet absolut. Ministritë tona dhe të gjitha institucionet do të ndajnë përgjegjesitë dhe do vënë para përgjegjësisë autorët e këtij krimi”, ka deklaruar Tahiri.
Ai ka shtuar se qeveria do të përforcojë masat ndëshkuese për prerësit e pyjeve, duke paralajmëruar se nuk do të ketë vetëm gjobë, por edhe ndëshkime penale.
Të parët që do të bien pre e këtyre masave, ka nënvizuar Tahiri, do të jenë ata punonjës të policisë dhe strukturave të shtetit që mbyllin sytë përpara kësaj dukurie.
Ndërsa ministri i Mjedisit, Lefter Koka, në fjalën e tij ka kritikuar strukturat shtetërore përgjegjsë për neglizhencën e treguar sipas tij në ruajtjen e pyjeve.
“Për fat të keq, puna juaj ka lënë për të dëshiruar”, ka thënë Koka. Por, sipas tij, në muajt e fundit ka nisur një koordinim më i mirë i institucioneve, që do të mundësojë sipas tij ruajtjen e mjedisit.
