Haxhinasto inspekton mbikalimin e Shkozetit, projekti përfundon brenda marsit
Ministri i Trasportit dhe Infrastrukturës, Edmond Haxhinasto, inspektoi sot punimet për ndërtimin e mbikalimit në Shkozet, pjesë e projektit për bypass-in e Durrësit.
Punimet për ndërtimin e kësaj nyje të rëndësishme rrugore në kryqëzimin që lidh autostradën Tiranë – Durrës me bypass-in e Durrësit dhe asket kombëtare drejt zonës jugore të vendit kanë rifilluar në muajin Janar 2014 dhe pritet të mbarojnë në fund të Mars 2015, duke përfshirë në këtë afat sinjalistikën dhe ndriçimin.“Puna ka ecur me ritmet e pritshme. Ky projekt po realizohet me standardin dhe cilësinë e kërkuar nga ne dhe duket se do të kemi gati në fund të këtij muaji përfundimin e punimeve në këtë nyje kaq të rëndësishme. Përfundimi i mbikalimit të Shkozetit do t’i japë rrjedhën e duhur qarkullimit rrugor” – tha Ministri Haxhinasto.
Në vijim ai theksoi: – “Ju kërkoj gjithë kontraktorëve të punojnë me ritme të shpejta në akset kryesore në vend, të jemi gati për sezonin turistik, por pa anashkaluar standardin dhe cilësinë, 2 prioritetet tona në ndërtimin e veprave”.
Ky mbikalim është një investim prej rreth 8 milionë euro dhe përfshin edhe kolektorin e ujërave, me gjatësi 1.5 kilometra në Durrës në zonën e Plepave. Projekti pësoi ndryshime gjatë vitit 2014-të duke shtuar edhe gjelbërimin dhe nga afati 22 mujor i parashikuar në kontratë realizimi i tij do të jetë brenda një afati 16 mujor.
