62 të vdekur pas rrëzimit të një avioni

Një avion i nisur nga Dubai u rrëzua gjatë uljes në qytetin rus të Rostovit mbi Don duke shkaktuar vdekjen e 62 personave, njoftoi sot media lokale ruse.

”Avioni tip ‘Boeing 737’ i kompanisë ‘FlyDubai’ u rrëzua në kushtet e një pamjeje shumë të kufizuar nga ana e pilotëve, rreth 100 metra në të majtë të pistës së aeroportit”, shpjeguan burime të shërbimit të kontrollit, të cituara nga ”Russia Today”.

“Rrëzimi i avionit ndodhi gjatë përpjekjes së tij të dytë për t’u ulur në aeroport”, tha nga ana e saj agjencia ruse e lajmeve ”Interfax”.

”Të gjithë pasagjerët dhe anëtarët e ekuipazhit kanë vdekur”, tha agjencia ruse e lajmeve, TASS.

”Ndërkohë, u arrit gjetja e një prej kutive të zeza të avionit”, tha agjencia tjetër ruse e lajmeve, Ria Novosti.