Agjencia bërthamore e OKB-së, e pakënaqur nga bashkëpunimi me Iranin

Kreu i Agjencisë Ndërkombëtare të Energjisë Atomike është shprehur i pakënaqur në lidhje me progresin e kryer në muajt e fundit në lidhje me bashkëpunimin e Iranit mbi programin e tij bërthamor.

“Është e vërtetë se ne kemi pasur angazhim të Iranit për çështje me dimension ushtarak. Por në muajt e fundit, progresi ka qenë tepër i kufizuar”, u shpreh Yukiya Amano.

Komentet e kreut të Agjencisë së OKB vijnë para takimit të ditës së enjte, ku Sekretari amerikan i Shtetit, John Kerry, do të takohet me homologun e tij iranian Mohammad Javad Zarif për arritjen e një marrëveshjeje, në përpjekje për të frenuar programin bërthamor të Teheranit.

Mediat ndërkombëtare shkruajnë se, takimi i së enjtes në Lozanë të Zvicrës ka ngritur spekulime se fuqitë e mëdha botërore janë pranë një marrëveshjeje me Teheranin.

Amano tha se është e nevojshme të ketë një përshpejtim të progresit, i cili deri tani ka qenë i kufizuar. Diplomati japonez dukej optimist rreth zbatimin të marrëveshjes, ‘nëse ajo është arritur’. “Nëse është rënë dakord për një marrëveshje, është në interes të Iranit që ta zbatojë atë”, tha Amano.