Ahmetaj: Qëndrimet e opozitës për ekonominë janë dezinformuese
Ministri i Financave, Arben Ahmetaj deklaroi të mërkurën se ekonomia ka një trend pozitiv rritjeje. Në një deklaratë për mediat nga kryeministria, pas mbledhjes së qeverisë, ministri Ahmetaj tha se qëndrimet e opozitës për ekonominë janë dezinformuese.
Më herët, deputetja e Partisë Demokratike, Jorida Tabaku tha se përballë gjendjes së rënduar ekonomike qeveria ka zgjedhur rrugën më të lehtë, propagandën ministrore për t’i mbushur mendjen shqiptarëve që po jetojnë në pranverën ekonomike. “Megjithëse shifrat dhe të dhënat, të zhveshura nga propaganda bajate, flasin krejt të kundërtën”, shtoi ajo.
Por, ministri Ahmetaj hodhi poshtë pretendimet e opozitës duke u shprehur se shifrat zyrtare të Bankës së Shqipërisë konfirmojnë zhvillimet pozitive. Sipas Ahmetaj, eksportet në 4-mujorin e parë u rritën me 1.5 %, ndërsa kredia konsumatore me mbi 12 %.
“Të ardhurat janë në rritje të konsoliduar dhe janë duke ecur në drejtimin e duhur në të gjithë kursin makroekonomik e fiskal”, deklaroi ai. Ahmetaj po ashtu u ndal në një tjetër tregues, papunësinë tek të rinjtë. Për këtë, ai u shpreh se shifrat e Institutit të Statistikave konfirmojnë së papunësia tek të rinjtë është ulur me 17.1 % dhe se kjo është norma më e ulët në rajon.
Ministri informoi se shumë shpejt qeveria do të prezantojë një paketë e cila do të lehtësojë ndjeshëm procedurat për biznesin si dhe do të ndikojë në përmirësimin e klimës për të bërë biznes.
