AKPM për tre muaj ndëshkon 20 subjekte farmaceutike
Trafikimi me barnat ilegale është njëri ndër shqetësimet më të mëdha të shoqërisë kosovare. Shoqëria jonë ka vite që po e lufton këtë fenomen, por ajo ende nuk ka arritur që ta çrrënjosë ende atë. E lidhur me këtë problem është duke punuar edhe Agjencioni Kosovar për Produkte Medicinale. Ky Agjencion për tre muaj ka ndëshkuar rreth 22 subjekte farmaceutike.
14 subjekte për përdorim të barnave ilegale, 6 subjekte për mungesë të farmacistit në vendin e punës. Si dhe një farmaci për mungesë të licencës për veprimtari qarkulluese të farmacisë.
Ardita Baraku, kryeinspektore e Inspektoratit farmaceutik ka thënë për Indeksonline se subjektet e dënuara janë nga Prizreni, Peja Obiliqi, Kamenica, Fushë Kosova, Istogu dhe si zakonisht numër më të madh ka nga Prishtina.
“Ndëshkimet për këtë vit janë më të shpeshta se sa ato të vitit të kaluar, por sasia e produkteve tek subjektet kanë pësuar rënie”, ka thënë Baraku për Indeksonline.
Ndërkaq gjatë vitit të kaluar në Republikën e Kosovës ka hyrë në fuqi ligji për produkte dhe pajisje medicinale.
Por problem për AKPM-në vazhdon të jetë numri i vogël i inspektorëve farmaceutik. Aktualisht veprojnë 10 të tillë, e sipas udhëheqësve të tij duhen të jenë së paku 20 inspektorë farmaceutik.
E për këtë vit, në AKPM janë dhënë dy licenca për prodhues vendorë të cilët kanë plotësuar kushtet e prodhimit, ndërkohë që katër të tjerë janë në pritje. Aktualisht në Kosovë ka 530 barnatore të licencuara dhe janë rreth 170 qarkullues me shumicë.
