Alarmi i FBI-së/Guvernatori i Kalifornisë: Nuk shohim kërcënime për sulme nga Irani

Guvernatori i Kalifornisë, Gavin Newsom, ka deklaruar se nuk sheh ndonjë kërcënim të afërt nga Irani, pavarësisht paralajmërimit të fundit të FBI-së për një sulm të mundshëm me dronë.

“Ne kemi qenë të informuar për këtë informacion. Bëhet fjalë për një qëndrim gatishmërie për skenarët më të këqij”, tha Newsom.

FBI-ja kishte paralajmëruar departamentet e policisë para luftës se Irani mund të tentonte të godiste shtetin amerikan.

Sipas një alerti të FBI-së, të cituar nga ABC News dhe media të tjera dyshohet se “Irani kishte synim të kryente një sulm të befasishëm duke përdorur automjete ajrore pa pilot nga një anije e paidentifikuar jashtë brigjeve të atdheut amerikan, konkretisht kundër pikave të paspecifikuara në Kaliforni, në rast se SHBA kryente sulme kundër Iranit”.

FBI-ja nuk kishte informacione shtesë mbi kohën, metodën, pikat ose autorët e këtij sulmi të pretenduar, i cili bazohej në të dhëna të marra në fillim të shkurtit 2026 dhe ishte shpërndarë si masë paraprake.

Newsom theksoi se shteti ka aktivizuar Qendrën e Operacioneve të Emergjencës që nga fillimi i luftës për të monitoruar rreziqet dhe po bashkëpunon ngushtë me partnerët lokalë, federalë dhe agjencitë e zbatimit të ligjit për të ndarë informacione në kohë reale.

Ai shtoi se çështjet me dronët kanë qenë gjithmonë prioritet dhe janë krijuar grupe pune specifike për këto shqetësime.

Zyrtarë të tjerë në Kaliforni, përfshirë kryetarin e bashkisë së San Franciskos dhe departamentet e policisë në Bay Area, kanë konfirmuar se nuk ka kërcënim të menjëhershëm të konfirmuar dhe se po monitorojnë situatën.

Ky zhvillim vjen në mes të tensioneve të larta nga lufta në Lindjen e Mesme mes SHBA-së, Izraelit dhe Iranit, ku Teherani ka kryer sulme me raketa dhe dronë ndaj baza ushtarake amerikane  caqeve në rajon, duke nxitur shqetësime për përhapje të mundshme të konfliktit.

Megjithatë, autoritetet kaliforniane po minimizojnë rrezikun aktual, duke theksuar gatishmërinë dhe mungesën e inteligjencës konkrete për një sulm të afërt.