Arsim Bajrami, kandidat i PDK-së për kryeparlamentar!

Partia Demokratike e Kosovës do të kandidoj profesorin Arsim Bajrami për kryetar të Kuvendit të Kosovës, në vazhdimin e seancës konstituive që mbahet këtë të premte më 12 shtator.

“Kandidati më i mundshëm është nënkryetari i partisë, Arsim Bajrami. Ai shihet si njeriu i cili mund të ketë përkrahjen edhe të deputetëve të partive të tjera politike, andaj PDK do ta kandidoj”, ka thënë burimi i gazetës KosovaSot.

Zyrtarë të lartë të PDK-së disa herë janë shprehur të bindur se do të arrijnë të zgjedhin kryekuvendarin, duke thënë se në seancën e 12 shtatorit do të kenë përkrahjen edhe të deputetëve të partive tjera.

Mirëpo, blloku LDK, AAK, NISMA të cilët do të kandidojnë sërish Isa Mustafën për kryetar të Kuvendit kanë deklaruar se deputetët e tyre nuk do të përkrahin asnjë kandidat të PDK-së.

Ndryshe, Gjykata Kushtetuese e ka quajtur të jashtëligjshme zgjedhjen e Mustafës në krye të Kuvendit, duke theksuar se Grupi më i madh parlamentar i takon PDK-së dhe vetëm kësaj partie i takon pozita e të parit të legjislativit.

Ndryshe, në seancën e kaluar PDK kishte propozuar për kryekuvendar, ish kryetarin e Ferizajt, Agim Aliu.