Artan Gjermeni, anëtari i ri i Këshillit Drejtues të Magjistraturës, Naço: Konsolidojmë pavarësinë

Konferenca Gjyqësore u mblodh sot për të zgjedhur anëtarin e Këshillit të Shkollës së Magjistraturës në bazë të ligjit të ri të miratuar nga mazhoranca pak kohë më parë.  Me 103 vota zgjedhur anëtar i Këshillit Drejtues të Magjistraturës eshte zgjedhur Artan Gjermeni.

Në fjalën hapëse të Konferencës kreu i Gjykatës së Lartë, Xhezair Zaganjori duke u ndalur tek raport-progresi i Komisionit Europian theksoi nevojën për reforma në drejtësi.

“Korrupsioni është një nga çështjet kryesore dhe do punohet për ta luftuar këtë fenomen. Ka vend për punë në pushtetin gjyqësor i cili ka humbur besimin e publikut dhe sipas raport-progresit është e nevojshme një strategji në gjyqësor”, deklaroi ai.

Ndërkohë, ministri i Drejtësisë Nasip Naço si përfaqësues i qeverisë shprehu vendosmërinë e ekzekutivit për t’i siguruar dhe garantuar pavarësinë institucionale dhe financiare Shkollës së Magjistraturës dhe këtu vlerësoi si një hap të mirë ndryshimet në ligjin për funksionimin e shkollës që përgatit gjyqtarët dhe prokurorët e vendit.

“Konsolidim të pavarësisë dhe profesionalizmit në gjyqësor dhe këtij objektivi i shërbejnë edhe ndryshimet në ligjin për Shkollën e Magjistraturës. Ndryshimet në ligjin e Shkollës së Magjistraturës konsoliduan pavarësinë dhe rritjen akademike të saj dhe një nga këto është zgjedhja e anëtarëve jo më nga KLD, por nga Konferenca e Gjyqtarëve. Qeveria është e vendosur të mbështesë pavarësinë institucionale dhe financiare”, deklaroi ndër të tjera ministri Naço.