Arvizu ‘mbetet’ ambasadori i SHBA në Shqipëri, senati amerikan hodhi poshtë kandidatët e Obamës
Ambasadori amerikan në Tiranë, Aleksander Arvizu, do të vijojë të jetë në këtë detyrë edhe për disa kohë.
Përpjekjet në Senatin amerikan për miratimin e ambasadorëve të rinj të nominuar nga presidenti Obama, ku përfshihet edhe Shqipëria, siç raportojnë edhe mediat ndërkombëtare u lanë në harresë.
Kjo ishte seanca e fundit për këtë sesion, i cli pritet të nisë pas një ndërprerjeje pushimesh prej rreth 5 javësh.
Senati ka kaluar sot vetëm emrin e ri të ambasadorit amerikan në Rusi. Ndërsa gjithë të tjerët duhet të presin sërish për një konfirmim.
Më shumë se një vit më parë, kur mandati i ambasadorit aktual në Tiranë, Aleksander Arvizu ishte drejt fundit, presidenti Obama përcaktoi në vend të tij Donald Lu.
Por, qysh atëherë, emërimi i tij mbeti i pakonfirmuar, pasi emrat e diplomatëve mbetën pa u diskutuar në senat.
Sesioni i Senatit do të nisë në fund të javës së parë të Shtatorit, por pritet që procesi i konfirmimit në Senat të nisë jo më herët se Nëntori, e mendohet të zgjasë deri në Dhjetor.
Deri atëherë, në Shqipëri do të vijojë në detyrën e ambasadori amerikan, sërish Aleksander Arvizu.
