Athina i paguan BQE-së 3,4 miliardë euro, detyrime të prapambetura

Greqia do t’i paguajë sot Bankës Qendrore Evropiane shumën e mbetur prej 3,4 miliardë euro, pas miratimit të një dite më parë nga ana e ministrave të Financave të eurozonës për zhbllokimin e këstit të tretë të ndihmës prej 23 miliardë euro, bëhet e ditur nga burime pranë qeverisë.

Shuma e 3,2 miliardë eurove principal dhe 200 milionë euro interesa u paguan mëngjesin e sotëm si dhe 7,16 miliardë euro do të shkojnë për rimbursimin e kredisë-urë akorduar muajin e kaluar për vendin nga të njëjtët kreditorë, duke i mundësuar shlyerjen e këstit të parë Bankës Qendrore Evropiane dhe rimbursimin e shumave të prapambetura FMN-së.