Australi, kryeministri Abbott sfidohet nga partia e tij

Kryeministri australian Tony Abbott po përballet me një sfidë të hapur ndaj lidershipit të tij nga anëtari i vjetër i kabinetit të tij, Malcolm Turnbull.

Zoti Abbott tha se një balotazh mund të mbahet më vonë gjatë së hënës për rolin e liderit dhe zëvendësit të tij në Partinë Liberale. “Unë do të kandidoj dhe pres të fitoj”, deklaroi ai.

Turnbull, i konsideruar prej kohësh një sfidant i fortë i kryeministrit aktual të vendit dhe ministres së Jashtme Julie Bishop i kishte kërkuar më herët zotit Abbott që të lejonte mbajtjen e një gare për lidership brenda partisë.

Sfida vjen vetëm 7 muaj pasi Abbott i mbijetoi një përballjeje të ngjashme dhe që prej atëherë është përballur me rënie të preferencave në sondazhe dhe armiqësi nga radhët e qarqeve të larta të partisë.

Në një konferencë shtypi të mbajtur në Kanberra, Turnbull tha se, nëse Abbott mbetet lider i partisë, atëherë koalicioni qeverisës do të humbasë zgjedhjet e ardhshme.

Ai tha se nuk kishte qenë e lehtë për të të merrte një vendim të tillë, për të sfiduar shefin aktual të qeverisë.

“Por është e qartë se qeveria nuk po arrin sukses në menaxhimin e ekonomisë dhe vendit i duhet një stil i ri lidershipi”, deklaroi Turnbull.