Bajrami, marrëveshje bashkëpunimi me universitete të njohura amerikane
Në kuadër të bashkëpunimit me universitetet amerikane, ministri i Arsimit Shkencës dhe Teknologjisë, Arsim Bajrami sot në shtetin federal Virgjinia është pritur nga presidenti i James Madison University, Jonathan Alger, nga presidenti i Eastern Mennonite University, Loren Swartzendruber dhe nga presidenti i Christopher Newport University, Paul Trible, me të cilët ka nënshkruar memorandume bashkëpunimi.
Siç thuhet në një njoftim për media të MASHT-it, me marrëveshjet e nënshkruara nga ministri Bajrami dhe presidentët e universiteteve është arritur bashkëpunimi për asistencën e këtyre universiteteve në reformimin e sistemit arsimor në Kosovë.
“Me anë të këtyre marrëveshjeve parashihet shkëmbimi dhe mobiliteti i studentëve dhe profesorëve ndërmjet këtyre universiteteve dhe universiteteve publike në Kosovë”.
Përveç marrëveshjeve të nënshkruara, gjatë takimeve në këto universitete të njohura amerikane, bëhet e ditur se ministri Bajrami ka kërkuar që ekspertët nga këto universitete të ndihmojnë universitetet tona në ngritjen e cilësisë, vlerësimin e performancës, menaxhimin e universiteteve dhe në akreditimin e programeve studimore.
Njoftohet gjithashtu se nesër, ministri Bajrami do të ketë takime në Departamentin e Edukimit të Shteteve të Bashkuara dhe do të pritet nga zyrtarët më të lartë të USAID-it, me të cilët do të bisedojë për vazhdimin e përkrahjes së Qeverisë Amerikane në kuadër të programit Lidershipi i Transformuar.
