Basha- Mogherini: Mirënjohje Italisë për mbështetjen pa rezerva ndaj Shqipërisë

Kryetari i Partisë Demokratike, Lulzim Basha, u takua me Ministren e Jashtme të Italisë, Federica Mogherini, e cila ndodhet në një tur vizitash në rajon në kuadër të marrjes nga Roma zyrtare të Presidencës së Bashkimit Europian.

Basha shprehu mirënjohjen e thellë për mbështetjen që ka treguar Italia mike në këto 23 vite për vendin tone. Partia Demokratike e konsideron marrjen e statusit si një mundësi të madhe për Shqipërinë dhe është e vendosur të japë kontributin e saj në këtë drejtim, theksoi ai.

Për situata politike në vend, Basha u shpreh se “ka degjeneruar në parametrat e një krize të gjithanshme për shkak të zhbërjes nga dyshja Rama-Meta të standarteve demokratike”, duke u ndalur në rastet konkrete të kapjes së institucioneve dhe ndërprerjes së paligjshme të mandateve ligjore e kushtetuese si për kreun e ILDKP, AMA, INSTAT dhe së fundmi dhe Shkollën e Magjistraturës”.

Basha i bëri të ditur ministres së Jashtme italiane se “sfiduesja më e madhe e ligjit në vend është vetë qeveria, e cila nuk respekton dhe nuk zbaton vendimin e gjykatave, duke nisur nga ato të Gjykatës Kushtetuese, si në rastin e Ligjit për Nëpunësin Civil, për kompetencat e INUK, për komisionet hetimore parlamentare dhe qindra vendime të tjera të gjykatave të vendit”.